Poslovne vijesti - Makedonija

Откупот на тутунот ќе почне на 15 декември

Откупот на тутунот нема да почне пред законски утврдениот рок, 15 декември, велат производителите. Чувањето на производството, кое најмалку две недели е подготвено за предавање нема да се одрази врз квалитетот.

- Нема никакви најави од фирмите за почеток на откупот иако сите услови се исполнети. Веројатно ќе се држат до законскиот термин, 15 декември. Во меѓувреме, Инспекторатот ги прегледа пунктовите и откако утврди дека мострите се истакнати, вагите избаждарени и има мерни инструменти за влага, песок, им издаде решенија за реализирање откуп- изјави Данчо Милевски, претседател на Сојузот на здруженијата на тутунопроизводители.

Според него, тутунот до средината на идниот месец, ако се чува соодветно, ќе добие на квалитет.

- Тутунот почнува да ферментира и тоа само ќе го зголеми квалитетот. Опасно е ако не се чува соодветно. Тогаш може да мувлоса - рече Милевски.

Земјоделците остануваат на барањето откупната цена да биде повисока од лани зашто годинава, како што нагласуваат, производствените трошоци се зголемени за 20 до 30 отсто.

- Бараме барем да се задржи ланскиот просек, 190 денари, или за прва, втора и трета класа да се плаќа по 250, 200 и 170 денари независно што според потпишаните договори цените се дефинирани на 208, 162 и 123 денари - рече Милевски.

Тутунарите очекуваат да биде откупено целото производство кое се проценува на околу 25.000 тони. Квалитетот, велат, е одличен, најдобар од досегашните најмалку пет до шест реколти.

Според Законот за тутунот, откупот треба да почне најдоцна до 15 декември, а завршува заклучно со 15 март.